Ciidamada dowladda iyo kuwa AMISOM oo isgarabsanaya ayaa howlgallo shalay gelinkii dambe ay ka sameeyeen deegaanno ka tirsan gobolka Bakool, ku toogtay maleeshiyaad ka tirsan Al-Shabaab, halka kuwa kale ay ka dhaawaceen.
Ciidamada ayaa deegaannada ay howlgallada ka sameeyeen waxaa ka mid ah Ceel Malable iyo Ceel Boon halkaasi oo ay ku dileen 25 ka tirsan Al-Shabaab, halka tiro kalena ay ku dhaawaceen.
Abaanduulaha ciidanka xoogga dalka gobolka Bakool Gaashaanle Sare Cabdi Maxamed Dile oo la hadlay Radio Muqdisho ayaa sheegay in howlgalkii shalay ay jab xoogan ugu geysteen maleeshiyada Al-Shabaab, isla markaana ay gacanta ku dhigeen tiro ka mid ah maleeshiyaadkii howlgalka ku dhaawacmay iyo saanad ay ka furteen.
25 ayaan ka dilnay, tiro kuwa dhaawac ah oo nool gacanta ayan ku haynaa, gaadiid iyo hub ayaa kala wareegay, hadda deegaanadii lagula dagaalamay Al-Shabaab waxaa gacanta ku haya ciidanka dowladda iyo kuwa AMISOM, maana jirto cid kale oo wax ku noqotay howlgalkaas” ayuu yiri Gaashaanle sare Cabdi Maxamed.
