Ra’iisul wasaaraha xukuumadda Federaalka ah ee Soomaaliya Mudane Cumar Cabdirashiid Cali Sharma’arke ayaa maanta xafiiska Wasiirka Warfaafinta, dhaqanka iyo dalxiisa ku qaabilay mas’uuliyiin ka tirsan labada gole ee dowladda.
Mudane Cumar Cabdirashiid ayaa ugu horeyn waxa uu la kulmay Wasiirka Warfaafinta, Wasiiru dowladaha iyo Wasiir ku-xigeenka kaasi oo uu Wasiirka koowaad uu Madaxda Wasaaradda kaga dhageystay warbixino la xiriirta Wasaaradda Warfaafinta, dhaqanka iyo dalxiiska, waxaana uu Ra’iisul wasaaruhu ku bogaadiyay Madaxda Wasaaradda inay sii dar dargeliyaan adeegyada ay Wasaaradda Warfaafintu u gudbiso bulshada.
Shirka waxaa goob joog ka ahaa Agaasimaha Telefishinka Qaranka Mudane Cabdiraxmaan Yuusuf Sheekh Al-cadaala iyo Agaasimaha Radio Muqdisho Mudane Cabdirixiin Ciise Caddow, oo Wasiirka koowaad ee xukuumadda Mudane Cumar Cabdirashiid uga warbixiyay howlaha Idaacadda iyo Tv-ga ay u hayaan bulshada iyo doorka Xukuumadda uga aadan dhiiri gelinta howlwadeenada Warbaahinta Qaranka.
Sidoo kale Ra’iisul wasaaraha ayaa intii uu ku sugnaa xafiiska Wasiirka Warfaafinta waxa uu kulamo saacado qaatay la yeeshay Xildibaanno iyo xeer ilaaliyaha guud ee Qaranka, kaasi oo ku saabsanaa kala warqaadasho iyo isu baraarujin u adeegidda bulshada Soomaaliyeed meelkasta oo ay joogaan.
Sawir Qaade:- Farxaan Suleymaan Daahir
