Degaanka Baxdo ee Gobalka Galgaduud oo qiyaastii 90 Kilomitir dhanka beri ka xiga Magaalada Cadaado, ayaa waxaa soo gaaray Qoysas Xoolo dhaqato ah oo kasoo barakacay Boob, Dil iyo Falal arxan daro oo Maleeshiyada Al shabaab ay kula kaceen.
Aabe Axmed waxa uu ka mid yahay dadka kasoo barakacay gumaadka ay Maleeshiyada Al shabaab ku hayeen, isagoona sheegay in dadkiisa ay dileen Argagaxisada Al shabaab, Beero iyo guryo uu lahaana ay ka gubeen.
“Al shabaab ayaa nasoo barakiciyay, Xoolo hadaan laheyn naga dhacay Maal hadaan laheyn naga qaatay, Nafteena noogu yimid, dadkii naga laayay, Tuulooyinkiina naga baabi’iyay, dadka Baxdo jooga ayaan u nimid si fiican ayay soo dhaweeyeen, aad iyo aad ayaana ugu baahanahay in gurmad nala soo gaarsiiyo”.
Xabiibo oo ah Hooyo Soomaaliyeed oo wadatay 7-caruur ah oo mid ka mida uu ka saqiiray ayaa sheegtay inay kasoo barakacday deegaan hoostaga degmada Xarardheere ee Gobalka Mudug ka dib markii Al shabaab ay ka gubeen Maqaayad iyo Dukaan ay laheyd isla markaana ay dhaceen hantideeda, nafteedana ay kala soo carartay.
“Waxaan ku suganahay Baxdo, dadkii ugu horeeyay ee soo qaxay ayaan ka mid ahay Maqaayad iyo Dukaan ayay iga gubeen Al shabaab, waxaan lasoo barakacay Todobo caruur ah hal ka mida ayaa iga saqiiray, runtii dhibaatooyin xoogan ayay na gaarsiin Al shabaab, dhac iyo boob, hantideena oo dhan way gubeen, walaalaha Soomaaliyeed ayaan ka codsaneynaa inay nasoo caawiyaan, Barakacayaal tira badan oo Labo Boqol gaaraya ayaa yimid oo wax ay heystaan jirin”.
Dhibanayaashan kasoo cararay Dhibaateynta Al shabaab ayaa sheegay in tiradooda ay ku dhowdahay 700 oo qoys, waxayna Dowlada Soomaaliya iyo Shacabka Soomaaliyeed ka codsadeen in loo gurmado maadaama Nabad diidka Al shabaab ay hantidooda iyo wixii ay heysteen ay dhaceen.
Kooxda Jid iyo Jiha diidka ee Arxan laawayaasha Al shabaab ayaa had iyo jeer u taagan dhibaateynta iyo dhicida Shacabka Soomaaliyeed ee aan waxba galabsan, iyagoona ka leexday qiyamka iyo wanaaga diinta suuban ee Islaamka.
