Madaxweynaha Jamhuuriyadda Federaalka Soomaaliya ayaa saaka magaalada Marka kula kulmay dhinacyadii ku dagaalamayay magaalada marka oo dhowaan ay heshiisiiyeen ciidanka 14-ka October ee xoogga dalka.
Mudane Maxamed C/laahi Farmaajo Madaxweynaha dalka ayaa khudbad u jeediyay dhinacyadaan oo uu kula kulmay meel fagaaro ah, iyadoo madaxweynuhu uu kula dardaarmay in aysan dib ugu laabadan kala qaybsanaantii Qabiilka iyo colaadihii mudada dheer soo jiitamayay.
Guddoomiyaha magaalada Marka ee Gobalka Shabeellaha Hoose Xasan Cumar Macalin oo waraysi gaar ah siiyay Radio Muqdisho ayaa sheegay dhinacyada uu la kulmay madaxweynaha inay aad u soo dhoweeyeen dadaalada dowladda ay ku bixinayso xal u helida magaalada Marka.
Madaxweynaha JFS Mudane Farmaajo iyo wafdi uu hoggaaminayo oo shalay tagay magaalada marka ayaa xalay ku hoday magaaladaas iyadoo madaxweynuhu uu kala kulmay qaybaha kala duwan ee Bulshada.
