Degmada Shangaani ee Gobalka Banaadir ayaa nasiib u yeelatay in ay noqoto Degmadii ugu horaysay ee ka qeyb qaadata barnaamijka Is-xilqaan ee dib loogu dayac tirayo xarumaha danta guud ee Dalka.
Maamulka iyo Shaqaalaha Degmada Shangaani oo ay hogaaminayso Gudduumiyaha Degmada Sahra Sheekh Maxamed Amiin ayaa maanta ka howlgalay Tiyaatarka iyo Maktabadda Qaranka.
Guddoomiyaha Degmada Shangaani ayaa sheegtay in ay diyaar u yihiin ka qeyb qaadashada Dalkaaga Is-xilqaan ku dhiso, isla markaana Degmooyinka kale ay ugu baaqayaan iney ka qeyb qaataan barnaamijka Isxilqaan oo Madaxweynaha Jamhuuriyadda Federaalka Soomaaliya Mudane Maxamed Cabdullahi Farmaajo uu daah furay si Dalka dib loogu dhiso.
Dhinaca kale Maamulka Gobolka Banaadir waaxda nadaafada iyo bilic soo celinta ayaa Olole nadaafadeed oo xoog leh ka sameeyay Madxafka Qaranka iyo hareerihiisa, Agaasimaha Waaxda Nadaafadda Gobalka Banaadir Cabdicasiis Goodax Barre ayaa sheegay in ay mar kasta heegan u yihiin bilic soo celinta Caasimadda.
Ugu danbayntii waxa kormeer shaqo ku soo gaaray Xarunta Madxafka Qaranka oo dhawaan si rasmi ah Madaxda Qaranku u dhagax dhigi donaan, Wasiirka Boostada, Isgaarsiinta iyo Teknoolajiyada Eng, Cabdi Cashuur Xasan.
Wasiirka ayaa ku soo wareegay qeybaha u ka kooban yahay madxafka Qaranka, asagoo indha indheeyay sida barnaamijka Isxilqaan uu uga socdo gudaha xarunta Madxafka Qaranka.
