Wasiirka Warfaafinta, Dhaqanka iyo Dalxiiska Xukuumadda Federaalka Soomaaliya Mudane Daahir Maxamuud Geelle ayaa ka qeyb munaasabad lagu weyneynayay maalinta caalamiga ah ee Afka Hooyo oo maanta lagu qabtay magaalada Muqdisho.
Xaflad oo ay soo qaban qaabiyeen maamulka Akadeemiyad Goboleedka Afka Soomaaliga ee AGA waxaa kaloo ka qayb galay mas’uuliyiin kale oo ka tirsan dowladda, qorayaal iyo marti sharaf kale, iyadoo kooxda fanka ee HIDDO ay madasha ku soo bandhigeen hees ka turjumaysa Afka iyo muhiimadiisa.
Guddoomiyaha Akadamiyad Goboleedka Afka Soomaaliga ee AGA Prof Maxamed Daahir Afrax ayaa xusay in muddo todobaad ah ay socon doonaan barnaamijyo lagu weynaynayo Afka Hooyo, kuwaas oo Akadamiyadu Hormuud u tahay.
Wasiirka Warfaafinta, Dhaqanka iyo Dalxiiska Xukuumadda Federaalka Soomaaliya Mudane Daahir Maxamuud Geele ayaa madaxda iyo howlwadeenada Akadamiyada uga mahadceliyay qabashada munaasabadaan, waxaana uu hoosta ka xariiqay sida dhallinyarada ay mas’uuliyad gaar ah uga saaran tahay ilaalinta Afka waliba kuwooda qurbaha ku nool.
Sanad walba 21 Feberaayo waxaa loo dabaal degaa maalinta caalamiga ah ee Afka Hooyo, iyadoo Soomaaliya si weyn looga xuso mar walbana la is xasuusiyo muhiimadda ay leedahay in la weyneeyo, la ilaaliyo, laguna faano afka Hooyo ee qaniga ah, waxaana hormuud u ah hay’adaha u xilsaaran ee akadamiyad goboleedka Afka Soomaaliga ee AGA iyo sidoo kale Akadamiyada Cilmiga, fanka iyo suugaanta.
