Shaqaale ka tirsan Wasaaradda Maaliyadda ee Xukuumadda Federaalka Soomalaiya iyo Wasaaradaha Maaliyadda ee heer Maamul Goboleed ayaa tababar loogu soo xiray magaalada Jinja ee Dalka Uganda.
Tababarkan oo soconayay muddo saddex todobaad ah oo ay ka qayb galeen shaqaale ka socda Wasaaradda Maaliyadda Federaalka iyo Shaqaale ka socday Wasaaraha Maaliyadda ee heer Maamul Goboleed ayaa waxaa ka qayb galay munaasabadda lagu soo xirayay tababarkaas, madax ka socotay Safaaradda Soomaaliya ee dalka Uganda.
Tabaabarkan oo fulintiisa ay iska kaashanayeen dowladaha Soomaaliya iyo Uganda ayaa ahaa mid sare loogu qaadayo aqoonta shaqaalaha ee dhanka Maaliyadda, kaaso oo ay ka qayb galeen tiro shaqaale kor u dhaafaya 30 qof.
Qaar ka mid ah shaqaalaha tababarka u soo idlaaday oo la hadlay Warbaahinta Qaranka Soomaaliya ayaa xusay inay waxbadan ka faa’iideysteen tababarka, ayna diyaar u yihiin inay bulshadooda ugu adeegaan.
Lataliyaha labaad ee Safaaradda Cali Qadar Wardheere oo ka hadlayay munaasabadda xiritaanka ee ka dhacday magaalada Jinja ee Uganda ayaa shaqaalaha tababarka qaatay ku baraajiyay in aqoonta ay halkan ka kororsadeen ay si daacad ah ugu adeegaan Qarankooda, ayna mas’uuliyad iska saaraan ilaalinta hantida Qaranka.
Dowladaha Soomaaliya iyo Uganda ayaa marar badan fuliyay tababaro nuucaan ah oo sare loogu qaadayo aqoonta shaqaalaha dowladda ee kala duwan, iyadoo midkana lagu tababarayay shaqaale ka tirsan hay’adaha dowladda u qaabilsan dhanka Maaliyadda uu yahay kuwii ugu muhiimsanaa.
