Jenaraal Maxamed Nuur Galaal waxa uu ku dhashay miyiga magaalada Ceelbuur.
Waxbarashadiisa aas aasiga ee dugsiga hoose waxa uu ku soo qaatay, iskuuladii talyaaniga ee ku yaalay, magaalooyinka Ceelbuur iyo Dhuusmareeb.
Isagoo da’yar ayaa loo soo wareejiyay dugsiga Militariga talyaaniga oo Muqdisho ku yaalay, markii uu marayay fasalka 8-aad ee dugsiga dhexe ayaa iskoolka uu dhiganayay waxa la wareegay ciidamo Boolis ah oo talyaani ahaa.
Kadibna sanadkii 1957-dii ayaa loo qaatay labo alifle ciidanka booliska ah, waxa uu taliye ka noqday saldhig ku yaalay dagmada Cabdulcasiis ee gobolka Banaadir oo markaa loo yaqanaay magac kale.
1959-kii markii la aas-aasayay ciidanka xoogga dalka waxa uu ka mid noqday, unugii ugu horeeyay, ee lagu bilaabo xoogga dalka.
1961-dii ayaa loo badalay magaalada Hargeysa isagoo Xidigle ah, waxa uu mudo ka howlgayay magaaladaasi.
Muddo ka dib waxa loo diray Ruushka isagoo 5 sano soo baranayay, qorshayaasha dagaalka, howl-galada, Sahanka iyo basaasnimada, waxa uuna u dalacay darajada sadex Xidigle.
1969-kii markii xoogga dalka uu afganbiyay dowlada sida uu sheegay, kama tirsaneeyn ragii ka qaybqaatay, waxa uuna ahaa taliye ku xigeenka xoogga dalka ee qaybtii Baydhabo daganeed.
Taliyaha qaybta dhexe ee magaalada Baladweyne ayaa laga dhigay isagoo halkaas ku dalacay darajooyinka Gaashaan, Gashaanle dhexe iyo Gashaanle sare.
Xisbigii kacaanka ayuu ka mid noqday golihii dhexe ee xisbiga, isagoo mar noqday wasiirka Howlaha guud.
1977-dii waxa uu mudo sadex bilood ah ku dajiyay qorshaha dagaalkii saban saban, kadibna waxa uu howl-galiyay ciidamadii xoogga dalka iyo Jabhadii gobonimo doonka oo isagu uu diyaariyay, tababaro dheeradana siiyay.
Waxa uu Itoobiya ka qabsaday magaalooyinka, Qabridahare, Diridhabe iyo magaalooyin kale oo waawayn.
Marxuumka alle ha u naxariiste waxa uu inta badan cimrigiisa iyo waqtigiisa u huray sidii ciidanka xoogga dalka uu u noqon lahaa cudud Afrikaantu ka cabsato.
Intii lagu jiray burburkii waxa uu ka shaqeeynayay nabadeeynta iyo sidii bulshadu iskugu tashan lahaayeen, waxa uu talooyin siin jiray si isxilqaan dowladahii dalka soo maray.
Waxa uu ahaa nin ay ku wayntahay Soomaalinimada, waxa uu aaminsana in uu markale arki doono Soomaaliya leh awood iyo ilbaxnimo kana garaad sareeysa Afkaanta kale.
Waxa uu ahaa dhaxal iyo taariikh aana ilaawi karin, balse wax magarato rabta in ay dabar gooyso dhaxalkeena iyo sooyaalkeena ayuu sabab saday gacantooda.
Geesi jecel in uu runta aadna u neceb qiyaanada ayuu ahaa.
Rabi naxariistii jano haka waraabiyo
W/Q: Osman Aden.
