Maadaama bandowgii horey uga jirey dalkan Turkiga laga khafiifiyey magaalooyinka qaarkood, gaar ahaan magaalooyinka waaweyn ee Istanbul, Ankara iyo kuwo kale oo jaaliyadda Soomaalidu deggantahay, qaarkoodna ganacsi ku haystaan.
Danjiraha Soomaaliya u fadhiya dalkan Turkiga Mudane Jaamac Caydiid ayaa bulshada Soomaaliyeed ee ku dhaqan dalkaas ugu baaqay in ay ilaaliyaan nidaamka lagu xakamaynayo faafidda cudurka COVID-19.
Danjiruhu wuxuu si gaar ah bulshada kula dardaarmay Afxirashada, kala fogaanshaha iyo nadaafadda gacmaha markasta. Wuxuu kale oo uu si gaar ah ula dardaarmay goobaha ganacsiga gaar ahaan makhaayadaha in ay ilaaliyaan kala fogaanshaha u gaarka ah, oo ah in labadii kursi ee isku xigaba mid bannaanyahay oo ay ku dhejiyaan callaamadda lama fadhiisan karo.
Makhaayadaha waxaa loo oggolyahay in ay isticmaalaan 50% kuraasta ay haystaan.
Sidoo kale Danjiraha ayaa Soomaalida ugu baaqay in sharciyadooda aysan guryaha ugu soo tegin, maadama Laamaha Amniga ee dalka ay wadaan baaritaanno.
Danjire Jaamac Caydiid ayaa ugu dambayntii ugu baaqay Jaaliyadda Soomaaliyeed ee dalka Turkiga deggan in xilliyada bandowga ah ay ku nagaadaan guryahooda.
