Munaasabadan oo aheyd mid lagu xusayay 8-da Juun oo ah maalinta caalamiga ah ee badaha Adduunka, oo ay soo qaban qaabiyeen ururka xirfadlayaasha ilaalinta badaha Soomaaliyeed ayaa waxaa ka qeyb galay mas’uuliyiin ka socotay Gobolka Banaadir iyo Dowlad Goboleedka Hirshabeelle, Aqoonyahanno ku xeeldheer badaha, dhallinyaro, ururro iyo mas’uuliyiinta ururka xirfadlayaasha ilaalinta badaha Soomaaliyeed.
Aqoonyahanno ku xeeldheer arrimaha badaha oo munaasabadda ka hadlay ayaa sheegay in xuska 8-da Juun ay tahay maalin muhiim u ah bulshada Soomaaliyeed, maadaama bulshada looga baahanyahay inay ka faa’iideystaan kheyraadka dabiiciga ah ee baddeena Alle ku manaystay.
Guddoomiyaha ururka xirfadlayaasha ilaalinta badaha Soomaaliyeed Caasho Cumar Geesdiir ayaa tilmaamtay muhiimada ay leedahay ilaalinta badaha ay ugu horeyso in la helo meel nabad ah oo ay kalluumeysatadu ku jalaaban karaan.
Wasiirka arrimaha Gudaha ee Dowlad Goboleedka Hirshabeelle Mudane Maxamed Cali Caadle ayaa ku bogaadiyay dadka soo qaban qaabiyay munaasabadda, isagoo shacabka ku dhiirigeliyay inay ka qeyb qaataan ilaalinta badaha.
