Wasiirka Amniga Gudaha Xukuumadda Federaalka Soomaaliya mudane, Cabdulllaahi Maxamed Nuur iyo ku-xigeenka Wakiilka gaarka ah ee xoghayaha guud ee Qaramada Midoobey u qaabilsan Soomaaliya Anita Kiki Gbeho ayaa si wadajir ah u guddoomiyay kulanka Guddiga fulinta ee barnaamijka wadajirka ah ee booliska, waxaana ka qeyb galay mas’uuliyiin ka kala socotay Wasaaradaha Amniga heer Federaal iyo heer dowlad Goboleed, saraakiil boolis iyo deeq bixiyeyaasha caalamiga ah.
Kulanka ayaa waxaa diirrada lagu saaray xaaladda amni ee dalka, gaar ahaan horumarinta ciidanka booliska Federaalka iyo kuwa dowladaha xubnaha ka ah Federaalka, waxaana lagu lafa-guray daboolidda baahiyaha hortebinta leh sida: Tababarrada iyo qalabeynta ciidamada, dhismaha iyo dayactirka saldhigyada Booliska, qaar ka mid ah dowlad-goboleedyada iyo xoojinta awood dhisidda ciidamada booliska labada heer.
kulanka oo ku soo dhammaaday jawi wanaagsan iyo is afgarad ayaa waxaa sidoo kale looga hadlay xoojinta iyo horumarinta amniga caasimadda, waxaana intii uu socday kulanka la isku afgartay meelmarinta dhammaan dalabka iyo baahiyaha la soo gudbiyay.
