Ciidamada xoogga dalka iyo kuwa Mareykanka ayaa xubno ka tirsan argagixisada Al-Shabaab la beegsaday duqeyn dhanka cirka ah oo ka dhacday deegaanka Dudubley oo gobolka Hiiraan.
Taliska ciidmada Mareykanka ee AFRICOM ayaa shaaciyey in ayagoo kaashanaya ciidamada dowladda Soomaaliya ay qaadeen weerar dhanka cirka ah oo ka dhan ah argagixisada Al-Shabaab.
Sida lagu sheegay war-saxaafadeedka hor-dhaca ah ee AFRICOM weerarkaas ay fuliyeen ciidamada huwanta ah ayaa deegaanka Dudubley ka dhacay 22-kii Bishan Febraayo.
“Qiimaynta khasaaraha dagaalka ayaa wali la sugayaa. Qiimeynta bilowga ah ee taliska ayaa ah in aysan jirin dad rayid ah oo ku dhaawacmay ama ku dhintay duqeyntan,” ayaa lagu yiri qoraalka Taliska AFRICOM.
Bayaankan ayaa sidoo kale lagu sheegay in ciidamada Maraykanka loo fasaxay inay fuliyaan weeraro lagu taageerayo ciidamada Soomaaliya ee la howlgala kuwa Mareykanka, sida uu dhigayo oggolaashihii Isticmaalka Ciidanka Milatariga Mareykanka ee 2001-dii.
Bayaanka AFRICOM ayaa lagu yiri, “Ciidamada Dowladda Federaalka Soomaaliya iyo kuwa Mareykanka ee Afrika ayaa qaadaya tillaabo weyn oo looga hortagayo khasaaraha soo gaara dadka rayidka ah. Dadaalladan ayaa ka duwan weerarada aan loo meel dayin ee ay al-Shabaab si joogto ah u geysato dadka rayidka ah.”
