Guddiga Gurmad Qaran oo uu Ra’iisul Wasaaraha JFS Mudane Xamse Cabdi Bare magacaabay iyo Hay’adda Maareynta musiibooyinka Qaranka (SoDMA) ayaa maanta qabtay Munaasabad lagu taakulaynayey Dadka ay hantida uga burburtay Qaraxii Soobe.
Waxaa ka soo qeybgalay Wasiirka Wasaaradda Waxbarashada, Hidaha iyo Tacliinta Sare ahne Guddoomiyaha Guddiga Maaliyadda ee Gurmad Qaran, Guddoomiyaha Haweenka Soomaaliyeed Batuule Sheekh Axmed Gabale , Wakiilka ganacsatada iyo Wakiilka Dhallinyarada oo ka mid ahaa Guddiga Gurmad Qaran.
Guddoomiyaha Hay’adda Maareynta Musiibooyinka Qaranka Soomaaliyeed Mudane Maxamuud Macalim Cabdulle oo ka mid ah Guddiga Gurmad Qaran ayaa u mahadceliyey dhamaan ummadii Soomaaliyeed oo dhaqaale ku tabarucay Gurmadka Qaran iyo Howlwadeenada Hay’adda SoDMA iyo Xarunteeda Howlgalada Gurmadka Degdegga ah (NEOC) oo maalintii qaraxu dhacay ilaa hada ka shaqeeynayey Gurmadka Qaranka.
Wasiirka Wasaaradda Waxbarashadda, Hidaha iyo Tacliinta Sare Mudane Faarax Sheikh Cabdiqaadir oo ahaa Guddoomiyaha Guddiga Maaliyadda ee Guddiga Gurmad Qaran ayaa ka tacsiyeeyey dhamaan intii ku dhimatay, sidoo kale sheegay in Guddiga Gurmad Qaran ay ku wareejinayaan dhaqaale ay Guddigu ugu talagashay in ay kab uga dhigtaan hantidii uga burburtay Musiibaddi Soobe-2 <span;>ee ka dhacay Isgoyska Soobe 29-kii Oktoobar 2022.
