Howlgal Militari oo shalay ka dhacay deegaanka Dumaaye ee Gobolka Mudug, ayaa lagu burburiyay xaruntii Khawaarijta ee Koonfuurta Gobolka Mudug.
Howlgakaan oo ay iska kaashadeen Ciidanka Qaranka iyo saaxiibada caalamka ah ee taageera dowladda iyo xoogagga shacabka, ayaa lagu beegsaday xarun ay Khawaarijtu ku laheyd duleedka Dumaaye halkaas oo aheyd mawlaca ay Khawaarijtu horay uga dhacday Culimada deegaanka una badashay xero ay ku tababaraan maleeshiyaadkooda, ku diyaariyaan Qaraxyada, hoyna u aheyd horjoogeyaasha maleeshiyaadka Khawaarijta ah.
Marka uu dhacayay howlgalka waxaa goobtaas ku faylsanaa maleeshiyaad gaaraya saddex boqol, waxaana hadallo marin habaabin ah u jeedinayay horjoogeyaal iyo kuwa diinta sida qaldan u fasira ee ay ugu yeeraan daaciyaal,
Hawlgalka oo u dhacay sidii loo qorsheeyay waxaa ku geeryooday 167 ka tirsan Khawaarijtii goobta taagnaa oo ay ku jiraan sadex horjooge, waxaa sidoo kale dhaawacmay 87 kale kuwaas oo dhaawacyadoodu u badan yihiin kuwa aad u liita.
Howlgalka,ayaa sidoo kale lagu burburiyay afar gaari oo ay ku jiraan labo nuuca loo yaqaano BG kuwaas oo ay saarnaayeen waxyaabaha qarxa , isla markaana sababay in uu sii bato qasaaraha Khawaarijtu. Waxaa halkaas ka dhashay dab wayn oo keenay in Khawaarijtii banaanka joogtay ay u gurman waayaan kuwa ku halaagsamay Xerada.
Dawladda waxa ay cambaaraynaysaa Khawaarijta oo ka aar gudanaaya howlgalkaas ay laayeen dad shacab ah oo u afduubnaa, kuwaas oo gaaraya shan qof, taas oo muujinaysa falalkooda ka baxsan Diinta Islaamka.
Dawladdu waxa ay u mahadcelinaysaa shacabka Soomaaliyeed iyo saaxiibada caalamiga ah ee gacanta ka gaystay howlgalkaan guulaystay.
