Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo waraysi gaar ah siiyey Warbaahinta Dalka Ereteriya, ayaa wax uu kaga hadlay xaaladda guud ee Soomaaliya xiriirka Ereteriya iyo Soomaaliya iyo sidoo kale Arrimaha Gobolka.
“ Waxaan halkaan u imid in aan mudane Madaxweyne Isaias Afawerqi Madaxweynaha Ereteriya ka wada xaajoono sidii loo xoojin lahaa xiriirka labadda dal iyo sidii xaaladda Soomaaliya,gaar ahaan dagaalka lagula jiro Argagixisada laaskaga kaashan lahaa ”ayuu yiri Madaxweyne Xasan.
Dhinaca kale Madaxweyne Xasan sheekh, ayaa xusay in Ereteriya weligeed la jirtay Soomaaliya garab istaagna siisay marar badan maantana ay ka go’an tahay ilaalinta xuduudaha lama taabtaanka ah ee Soomaaliya,isagoo uga Mahadceliyey Dowladda iyo Shacabka Ereteriya garab istaagga buuxa oo ay siiyaan Dowladda Soomaaliya.
Madaxweyne Xasan Sheekh Maxamuud, ayaa boggaadiyay doorka Ereteriya ee ku aaddan caawinta Soomaaliya, ee la dagaalanka kooxda argagixisada iyo ilaalinta madax banaanideeda iyo midnimada dhuleed.
Waxa aan ugu mahadcelinaynaa taageerada joogtada ah oo ay Eritrea siiso Soomaaliya.
“Eritrea waligeed waxay la jirtay Soomaaliya, Waana uga mahadcelineynaa taas. Eritrea ayaa si weyn u taageertay Soomaaliya iyo dagaalka ka dhanka ah khawaarijta. Eriteriya waxa ay taageertay ilaalinta madax-bannaanida, midnimada iyo wadajirka dhuleed ee Soomaaliya waana Mawqifka caalamiga ah ee Ereteriya” ayuu yiri.
