Guddoomiyaha Guddiga Ku meel gaarka ah ee u xilsaaran diyaarinta xeerarka doorashooyinka, Ururada iyo Xisbiyadda Jamhuuriyadda Federaalka Soomaaliya Mudane Mahdi Maxamed Guuleed oo Baarlamaanka ayaa labada aqal ka hor Akhriyay wax ka badal lagu sameeyey hindise sharciyeedka ururada iyo xisbiyada siyaasadda ee Dalka.
Intaas kadib Xildhibaanada labada Aqal ee Baarlamaanka Jamhuuriyadda Federaalka Soomaaliya ayaa ansixiyay Xeerka Ururrada iyo Xisbiyada Siyaasadda Jamhuuriyadda Federaalka Soomaaliya.
Guddoomiyaha Golaha Shacabka Baarlamaanka Jamhuuriyadda Federaalka Soomaaliya Mudane Sh Aadan Maxamed Nuur Madoobe ayaa ku dhawaaqay natiijada, isagoo sheegay inay Xeerka ogolaatay 177 Xildhibaan, waxaana ka aamusay hal mudane,ma jirin Xildhibaan diiday.
Baarlamaanka Jamhuuriyadda Federaalka Soomaaliya ayaa tan iyo horaantii bishan toos u guda galay dhameystirka Xeerka doorashooyinka Qaranka si shacabka Soomaaliyeed u heleen xuquuq dhameystiran oo ku aadan qof iyo cod, si meesha looga saaro doorasho dadban oo uu dalka ku sii jiro.
Dhinaca kale Wasiirka Arrimaha Gudaha Xukuumadda Federaalka Soomaaliya Cali Yuusuf (Cali Xoosh), ayaa labada Aqal ee Baarlamaanka Jamhuuriyadda Federaalka Soomaaliya uga mahaceliyey ansixinta sharciga Ururada iyo Xisbiyada siyaasadeed ee Dalka.
