Ergayga Madaxwaynaha JFS u qaabilsan Xasilinta iyo Ilaalinta Arrimaha Rayidka Xildhibaan Cumar Xaashi ayaa si rasmi ah u soo xiray Madasha Qaran ee Ilaalinta Bedqabka Rayidka kaas oo muddo labo maalin ah ka socday magaalada Muqdisho ee caasimadda Soomaaliya.
Madasha uu daahfuray Wasiir ku xigeenka Wasaaradda Arrimaha Gudaha, Federaalka Iyo Dib-u-heshiisiinta XFS ayaa inta uu socday waxaa lagu soo bandhigay Istiraatiijiyadda Hannaanka Bedqabka Rayidka, iyadoo ay ka soo qaybgaleen Wasaaradaha heer federal iyo kuwa Dowlad Goboleedyada oo ay shaqadoodu la xiriirto ilaalinta arrimaha Rayidka.
Sidoo kale, inta ay socotay Madasha ayaa lagu wadaagay talooyin iyo doodo wax ku ool ah oo la xiriira Bedqabka Rayidka, iyadoo wakiillada ka kala socday Dowladda, Bulshada Rayidka iyo Beesha caalamka ee ka qaybgalay Madasha ay isla garteen muhiimadda ay leedahay Bedqabka Rayidka.
