Xafladda Somali Night Awards oo ay soo qaban qaabiyeen dhallinyaro Soomaaliyeed ayaa lagu qabtay magaalada Nairobi ee dalka Kenya.
Danjiraha Dowladda Soomaaliya ee dalka Kenya Danjire Jabriil Ibraahim Cabdulle oo daah-furay xafladda ayaa tilmaamay inay tahay talaabo aad u wanaagsan oo yidodiile ku abuureysa bulshadeena.
“Waxaan rabaa inaan marka hore u mahadceliyo qaban qaabiyeyaasha xafladda, marka xigta Hambalyo ayaan leeyahay dhamaan inta guuleysatay, runtii shaqo adag ayay qabteen dadkii isku howlay xafladan”. Ayuu yiri Danjire Jabril.
Danjiraha ayaa tilmaamay in barnaamijkan uu yahay mid ku dayasho mudan, oo shacabka Soomaaliyeed ku dhiirigelineya inay ka qeybqaataan horumarka.
Danjire Jabriil oo la dardaarmayay guuleystayaasha ayaa yiri “Runtii abaal marintan waxaan rajeynayaa inaad ka hesheen awood cusub oo aad dardargelisaan adeegyada aad ku muteysateen abaalmarinta, waxaana sharaf ii ah inaan magaalada Nairobi idinkugu soo dhaweeyo”.
Danjire Jabriil ayaa ka qeybgalayaasha oo ka kala socday dowladaha Soomaaliya iyo Kenya uga mahadceliyay waqtiga ay ku bixiyeen barnaamijkan, isagoo intaa ku daray in Safaaraddu ay garab taagantahay martida xafladda abaal marinta ka qeybgashay ee ka yimid dalkeenna.
