Guddiga Madaxa-Bannaan Ee Doorashooyinka Qaranka iyo Soohdimaha ayaa maanta shahaadada rasmiga ah ee ururnimo guddoonsiiyey urur-siyaasadeedyo cusub oo soo buuxiyay shuruudaha diiwaangelinta Ururrada.
Munaasabad ka dhacday Xarunta dhexe ee Guddiga Doorashooyinka Qaranka iyo Soohdimaha ayaa shahaadada rasmiga ah ee ururnimo lagu gudoonsiiyey Urur siyaasadeedyada kala ah Ururka Cadaaladda iyo Wadajirka, Ururka Cadaaladda iyo Dib-u-heshiisiinta, Ururka Dan-shacab, Ururka Soomaalinimo, Ururka Xal Qaran, Ururka Xurnimo iyo Xaqsoor, Ururka Cagaaran ee Soomaaliya, Ururradaan ayaa soo dhamaystiray shuruudihii laga rabay.
Guddoomiyaha Guddiga madaxa banaan ee doorashooyinka Qaranka Mudane Cabdikariim Axmed Xasan oo khudbad ka jeediyey Munaasabadda shahaadooyinka lagu gudoonsiinaayey Ururradaan cusub ayaa sheegay in Diiwaan-gelinta ururada ay ku eg tahay maanta oo ah 14-May, balse ay jiraan ururro soo buuxiyey qaar ka mid ah shuruudihii looga baahnaa, kuwaas oo wadada ku soo jira oo maalmaha soo socda ku soo dhamaystiridoona shuruudaha kale ee looga baahanyahay.
Madaxda Ururada siyaasadeed ee maanta la guddoonsiiyay shahaaddooyinka ayaa dhankooda caddeeyay in ay diyaar u yihiin ka qeyb galka doorashooyinka dalka.
