Mas’uuliyiin ka tirsan dowladda Federaalka Soomaaliya ayaa magaalada Laascaanood ee gobolka Soolka waxa ay ka wadaan, kulamo lagu dardargelinayo dhammeystirka maamul goboleed cusub ee SSC-Khaatumo
Guddoomiye ku xigeenka Aqalka Sare ee Baarlamaanka Federaalka Soomaaliya, Senator Cabdullaahi Cali Xirsi (Timacadde), Wasiirka Arrimaha Gudaha, Federaalka iyo Dib-u-heshiisiinta Xukuumadda Federaalka Soomaaliya, Xildhibaan Cali Yuusuf Cali (Cali-Xoosh), iyo Wasiirka Tamarta iyo Biyaha Cabdullaahi Bidhaan Warsame, ayaa maanta kulan muhiim ah kula yeeshay magaalada Laascaanood, qaar ka mid ah isimada dhaqanka ee SSC-Khaatumo.
Kulanka ayaa looga arrinsaday dhameystirka Maamulka SSC-khaatumo iyo kaalinta ay ku leeyihiin hoggaanka dhaqanka, nabadeynta, Wadajirka Bulshada iyo ilaalinta midnimada.
