Marwada Madaxweynaha Jamhuuriyadda Federaalka Soomaaliya, Marwo Sahro Cumar Xasan, ayaa maanta iska diiwaangelisay degmada Dharkeenley ee gobolka Banaadir, si ay u qaadato kaarka codbixinta doorashada dadweynaha ee la filayo in ay dhawaan ka dhacdo dalka .
Marwo Sahro Cumar Xasan ayaa ugu baaqday shacabka Soomaaliyeed in ay si buuxda uga qeyb-qaataan diiwaangelinta kaarka codbixinta, si ay u doortaan qof ay siyaasad ahaan ku qanacsanyihiin. Waxay xustay in ka qeyb-galka doorashooyinka uu yahay waajib muwaadinimo oo muhiim u ah dhismaha dowladnimada iyo matalaadda shacabka.
“Qaadashada kaarka codbixinta ma aha oo keliya hab doorasho, waa fursad uu muwaadin kasta ku muujin karo codkiisa, kalsoonidiisa iyo doorkiisa dhismaha mustaqbalka dalka,” ayay tiri Marwadu.
Marwada Madaxweynaha ayaa ka mid noqotay boqollaal qof oo safaf dhaadheer u galay qaadashada kaarka codbixinta, iyadoo sidoo kale bogaadisay dadaalka hay’adaha dowladda iyo shacabka Soomaaliyeed ee ku aaddan hirgelinta doorasho qof iyo cod ah oo saldhig u noqon doonta dowladnimo ku dhisan rabitaanka shacabka.
Diiwaangelinta codbixiyeyaasha ayaa si habsami leh uga socota guud ahaan dalka, gaar ahaan maamul-goboleedyada Galmudug, Koonfur Galbeed, Hirshabeelle iyo gobolka Banaadir, iyadoo dadweynuhu ay muujinayaan firfircooni iyo ka go’naansho .
Ugu dambeyn, Marwada Madaxweynaha ayaa ku boorrisay dhammaan muwaadiniinta Soomaaliyeed in ay ka faa’iideystaan fursaddan, si ay door muuqda uga qaataan dhismaha dowlad ku saleysan rabitaankooda.
