Golaha Wasiirrada Jamhuuriyadda Federaalka Soomaaliya ayaa si rasmi ah u ansixiyay dhammaan xubnaha magacaabista ku imaanaya ee ka mid noqonaya Golaha Sare ee Garsoorka, si waafaqsan Qodobka 145-aad ee Dastuurka Jamhuuriyadda Federaalka Soomaaliya.
Golaha oo fadhi hore ku ansixiyay afarta xubnood ayaa maanta dib u sixid iyo badel ku sameeyay xubnahan kadib soojeedin ka timid Wasaaradda Caddaaladda iyo Arrimaha Dastuurka, Xubinka la badeley ayaa ah Mudane Cabdiqaadir Cali Macalin, waxaana lagu badeley xeeldheere sharci Mudane Aadan Kuuloow Macalin Qaasim.
𝐗𝐮𝐛𝐧𝐚𝐡𝐚 𝐆𝐨𝐥𝐮𝐡𝐮 𝐚𝐧𝐬𝐢𝐱𝐢𝐲𝐚𝐲 𝐚𝐲𝐚𝐚 𝐤𝐚𝐥𝐚 𝐚𝐡:
1-Maxamed-deeq Macallin Aadan
2- Maryan Sheekh Cismaan
3-Cabdirisaaq Maxamed Ismaaciil
4- Aadan Kuuloow Macallin Qaasim
Xubnahan ayaa isugu jira Qareenno Sare, Xeeldheereyaal Sharci iyo Barayaal muddo dheer ka soo shaqeynayay horumarinta cilmiga iyo ku dhaqanka sharciga, kuwaas oo leh aqoon iyo waayo-aragnimo heer sare ah. Waxay xubinnimada Golaha Sare ee Garsoorka ku adeegayaan muddo shan (5) sano ah, iyagoo door muhiim ah ka qaadan doona gudashada waajibaadka dastuuriga ah ee Golaha.
Xubnaha kale ee Golaha Sare ee Garsoorka ayaa ku imaanayaan xilkooda (Hadba Mas’uulka xilkaas haya uu ka mid noqonayo golahan), waxayna xilalkan kala yihiin:
1. Guddoomiyaha Maxkamadda Sare
2. Guddoomiyaha Maxkamadda Dastuurka
3. Xeer Ilaaliyaha Guud ee Qaranka
4. Guddoomiyeyaasha Maxkamadaha Kore ee Dowlad goboleedyada iyo Maamulka Caasimadda Jamhuuriyadda
5. Guddoomiyaha Guddiga Madaxabannaan ee Xuquuqda Aadanaha.
