Taliyaha Ciidanka Xoogga Dalka Soomaaliyeed, Sareeye Guuto Ibraahim Maxamed Maxamuud, iyo wafdi uu hoggaaminayo oo ka kooban saraakiil sare oo ka tirsan Ciidanka XDS ayaa si rasmi ah u gaaray Jamhuuriyadda Turkiga.
Booqashada rasmiga ah ee Taliyaha iyo wafdigiisa ayaa qeyb ka ah dadaallada lagu xoojinayo xiriirka iyo iskaashiga dhinacyada difaaca iyo amniga ee u dhexeeya Soomaaliya iyo Turkiga.
Inta uu socdaalku socdo, Taliyaha iyo wafdigiisa ayaa la filayaa inay kulamo la yeeshaan mas’uuliyiin iyo saraakiil sare oo ka tirsan dowladda iyo ciidamada Turkiga, iyadoo diiradda lagu saarayo xoojinta iskaashiga milatari, tababarrada iyo tayeynta Ciidanka Xoogga Dalka Soomaaliyeed.
Soomaaliya iyo Turkiga ayaa muddo dheer lahaa iskaashi dhow oo dhinacyada difaaca, amniga iyo tababarrada ciidamada ah, iyadoo iskaashigaasi uu door muhiim ah ka qaadanayo dhismaha iyo horumarinta awoodda Ciidanka Xoogga Dalka Soomaaliyeed.
