Aaladaha Facebook, Instagram, WhatsApp iyo Messenger ayaa mar qura hawada ka baxay kadib markii ay ku timid cilad, taasi oo keentay inay saameyso dad aad u fara badan oo dunida ku kala nool.
Al-Jazeera ayaa ku warantay in dadka isku daya inay galaan facebook ay ka hor imanayso farriin dhaheysa “Raali noqo, waxbaa qaldan. waan ka shaqeyneynaa, waana xallin doonnaa, sida ugu dhaqsiyaha badan oo aan u awoodno”.
“Waxaan ka warqabnaa in dadka qaar ay dhib badan ku qabaan helidda ama gelidda baraheenna” ayaa lagu yiri qoraal ka soo baxay Madaxda shirkadda Facebook, kaasi oo lagu daabacay barta Twitter-ka.
Qoraalka ayaa sidoo kale lagu yiri “Waxaan ka shaqeyneynaa inay wax waliba sidii caadiga ahaa ku soo laabtaan sida ugu dhaqsiyaha badan, uguna macquulsan, waxaana idinka raali gelineynaa caqabadda ku timid dhanka isticmaalka”.
Cilladdan ayaa timid maalin kadib markii gabar ka shaqeyn jirtay Facebook ay ka tagtay, balse dib laga ogaaday inay horay u qaadatay dokumentiyo sir ah, sida barnaamijka 60 Minutes ee taleefishinka CBS ee Mareykanka uu shaaciyey, in shirkadda ay qarisay xogta daraasad ay ku ogaatay in bogaggeeda ay huriyaan naceybka iyo rabshadaha, halisna ku yihiin maskaxda caruurta.
Gabadhaan oo lagu magacaabo Frances Haugen, oo ah 37 jir ah kana soo jeeda gobolka Iowa, ayaa sheegtay inay la soo shaqeysay shirkadaha Google iyo Pinterest, balse aysan arag wax loo dhigo sida ay Facebook u xun tahay.
