Related posts
Abwaan Cabdullahi Xirsi Baarleex oo sanooyinkaan dambeba ku xanuunsanaa Magaalada hargeysa ee Gobolka Waqooyi Galbeed ayaa Maanta ka dhoofay Garoonka Diyaaradaha Aaden Cadde ee Magaalada Muqdisho, si baaritaan Caafimaad loogu sameeyo Dalka Turkiga.
Abwaanka ayaa muddooyinkaanba la il darraa xanuun, isagoo Dowladda Soomaaliya weydiistay inay baaritaan Dalka dibaddiisa ah loogu diro, maadaa loo sheegay in Dalka gudahiisa aanan wax looga qaban karin, ayaa waxaa haatan balanqaaday islmarkaana dammaanad qaaday Caafimaadkiisa iyo daaweyntiisaba Madaxweynaha JFS Mudane Maxamed Cabdullahi Maxamed farmaajo.
Garoonka Aadan Cadde oo uu ka ambabaaxay Abwaan Cabdullahi Xirsi Baarleex oo dalka turkiga xaalad Caafimaad awgeed uu ugu diray Madaxweynaha Soomaalia mudane Maxamed Cabdullahi Farmaajo kadib markii gudaha dalka xaaladiisa lagula tacaali waayay ayaa waxaa sii sagootiyey Xildhibaan Cilmi Cumar Ceysane, Agaasimaha Warfaafinta Madaxtooyada Cabdunuur Maxamed Axmed, Mareeyaha Golaha Murtida iyo Madadaalada ee National Theatre Abwaan Cismaan Cabdullahi Guure iyo qaarka mid ah Abwaanada Soomaaliyeed ee Muqdisho ku dhaqan.
Abwaan Cabdullaahi Xirsi Baarleex oo warbaahinta la hadlay ka hor intuusan ka ambabixin Garoonka Diyaradaha Aadan Cabdulle waxa uu u mahadceliyey Madaxweynaha Jamhuuriyadda Federaalka Soomaaliya, Mudane Maxamed Cabdullaahi Farmaajo, kaasi oo u suurtgaliyay inuu maanta u dhoofo Dalka Turkiga, si loola tacaalo xaaladdiisa caafimaad.
Maareeyaha Golaha Murtida iyo wacyi galinta Qaranka Cismaan Cabdullhi Guure oo isna goobtaasi ka hadlay ayaa sheegey in Madaxweynaha Soomaaliya uusan Abwaan Cabdullhi Xirsi Baarleex ka kow aheyn fanaaniinta iyo abwaanada uu Caafimaad dibadda ah u diray taana ay uga mahad celinayaan.
Xildhibaan Cilmi Cumar Ceynsane ayaa wax laga xumaado ku tilmaamay kuwa baraha Bulshada sida khaldan uga hadlaya Safarka Abwaan Baarleex farriinna u diray dadkaasi.
Abwaan Cabdullhi Xirsi Baarleex oo ah Abwaan Qaran ayaa Magaalada Muqdisho soo gaarey bishii maarso ee sanadkaan, waxa uuna ka yimid Gobolada Waqooyi ee Dalkeena oo uu muddo ku xanuunsanayay.
