Wasiirka Wasaaradda Boostada, Isgaarsiinta iyo Teknoolajiyada iyo Xildhibaano ka tirsan Golaha Shacabka ayaa ka qeyb galay munaasabad uu xilka kula wareegayey Agaasimaha Guud ee Wasaaraddaas kaas dhawaan la magacaabay.
Agaasimihii ee hore ee Wasaaradda Boostada, Isgaarsiinta iyo Teknoolajiyada Mudane Cabdiraxmaan Maxamed Cadow oo xilka wareejiyey ayaa sheegay in mudadii uu xilka soo hayey ay u qabsoomeen waxyaabo badan oo ay ka mid tahay Ansixinta Xeerka Isgaarsiinta Qaranka.
Agaasimaha Cusub ee ee Wasaaradda Boostada, Isgaarsiinta iyo Teknoolajiyada Mudane Cabdicasiis Duwane Isaaq ayaa ka codsay Shaqaalaha Wasaaradda inay siwada jir ula shaqeeyaa, isla markaana u balan qaaday in uu si cadaalad ah ugu adeegi doono.
Wasiirka Wasaaradda Boostada, Isgaarsiinta iyo Teknoolajiyada Ing Cabdi Canshuur Xasan ayaa tilmaamay in uu soo dhaweynayo isbedelka cusub ee Wasaaradda ku yimid, loona baahan yahay in Agaasimaha cusub uu la-yimaado dardargalin dhanka shaqada ah.
“Runtii maanta waa maalin weyn, Wasaaraddu waxa ay u tahay maalin qiimo badan, waa maalin runtii taariikhda baal dahab ah ka geli doonto, in aan sunno ka dhigano oo aan dhaqan ka dhigano in xil wareejinta ay noqoto mid meerta ah oo qofkasta oo ku haboon loo dhiibo, runtii waxa ay ku soo aaday xilli wasaaraddu ay u baahantahay dhiig cusub” ayuu yiri Wasiirka Boostada.
Wasaaradda Boostada, Isgaarsiinta iyo Teknoolajiyada ayaa waxyaabaha u qabsoomay waxaa kamid ah inay soo wareejiso Astaanta .SO kaas oo horay u maqneyd gacanta dowladda.
