Tartan cilmiyeedka bisha Ramadaan oo galay sanadkii todobaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa la soo gabo gabeeyay wareegga labaad ee tartanka, waxaana tartanka isugu soo haray sideed degmo sida uu shaaciyay Sharma’arke Maxamed Warsame oo xubin ka guddiga tartanka.
Guddoomiyaha guddiga Tartanka Maxamed Abuukar Axmed ayaa sheegay in marale qori tuur loo sameynayo degmooyinka tartanka isugu soo haray, si degmo kasta ay ku qanacdo qori tuurka ku soo aado.
Cabdinaasir Daahir Sabriye oo ka mid ah guddiga tartanka ayaa sameeyay qori tuurka oo ay daawadayaasha ka daawanayeen Telefishinka Qaranka halka dhageystayaasha ay kala socdeen Radio Muqdisho iyo live stream-ka Websiteka Radiomuqdisho.net, waxaana degmooyinka isugu aadeen sida soo socota:-
- Yaaqshiid Vs Shibis
- Hodan Vs Boosaaso
- Warta Nabadda Vs Jilib
- Xamar Jajab Vs Kismaayo
Habeen dambe haddii uu Alle idmo oo ah habeenka labo iyo labaatanaad ee tartanka, waxaa foodda is dari doono, tartamaayasha degmooyinka Yaaqshiid Vs Shibis oo ka wada tirsan Gobolka Banaadir.
