Aqoon iswaydaarsigan oo ay soo abaabuleen Midowga Afrika iyo Guddiga Madaxa bannaan ee Doorashooyinka Qaranka ee Soomaaliya ayaa waxaa kasoo qayb galay gudoomiyaha Guddiga madaxa bannaan ee Doorashooyinka Marwo Xaliimo Ismaacii;l (Xaliimo Yareey) Xildhibaanno ka socday Guddiga ammaanka ee Golaha Shacabka, Wasiirada Amniga ee Maamul Goboleedyada iyo Agaasimayaal Guud oo ka socday Wasaaradaha heer Federaal ee Soomaaliya, waxaa kale oo joogay taliyaasha ciidamada Amniga ee Soomaaliya.
Aqoon-iswaydaarsigan ayaa waxaa soo kale kasoo qayb galay madax ka socotay dalka Uganda oo ka mid ahaa guddoomiyaha guddiga Doorashooyinka Uganda iyo madax ka socotay safaaradda Soomaaliya ee Uganda.
Marwo Xaliimo Yareey oo saxaafadda kula hadashay ayaa sheegtay in shirkan uu yahay mid looga arin sanayo sida dhanka amniga iyo waayo aragnimo looga faa’idaysan lahaa dalalka Afrika ee xaaladda dalkeena oo kale soo maray.
Xaliimo yareey oo ka hadlaysa aqoon iswaydaarsiga ayaa xustay in ka guddi ahaan ay wax badan ka fa’iideysan doonaan, ayna diyaar u yihiin inay ugu adeegaan bulshada waxyaabaha ay ka soo kororsadaan aqoon is weydaarsiga.
Shirkan oo socon doono muddo saddex cisho ah ayaa waxaa lagu wadaa in lasoo gabagabeeyo maalinta Khamiista ah, iyadoo halkaas warmurtiyeed laga soo saari doono wixii kasoo baxa kulamadii la qaatay.
