Ku-xigeenka Hantidhowraha Guud ee Soomaaliya Mudane Cabdijamaal Ismaaciil ayaa maanta Muqdisho ku soo xiray Aqoon-isweydaarsi ku saabsan Fahamka iyo Tebinta Natiijooyinka Warbixinnada Baariseed ee Xafiiska Hantidhowrka Guud ee JFS oo ay ka soo qayb-galeen Wariyeyaal ka socday qaar kamid ah Warbaahinta Maxaliga ah.
Ujeedka aqoon-is-weydaarsigan ayaa ahaa in faham guud laga siiyo, korna loo qaado xirfadda iyo aqoonta lagama maarmaanka u ah war-fidiyeenada marka ay tabinayaan warbixinnada hantidhowr iyo in ay si saxan oo hufan u fahmaan, uguna gudbiyaan natiijooyinka baarista handtidhowr muwaadiniinta Soomaaliyeed iyo daneeyeyaasha kale. Waxaana bahda warbaahinta laga siiyay faham buuxa oo ku saabsan hababka hantidhowrista, erey-bixinta, iyo hab-dhaqannada ugu wanaagsan ee ka warbixinta iyo tebinta arrimaha maamulka maaliyadda dowladda.
Ku Xigeenka Hantidhowraha Guud ee JFS ayaa si qotodheer u tilmaamay ahmiyadda gaarka ah ee uu Xafiisku siinayo sare u qaadida xiriirka iyo wadashaqeyta bahda warbaahinta, si sare loogu qaado isla-xisaabtanka, dahfurnaanta iyo dowlad dhiska Soomaaliya.
Ugu danbeyn, Ku Xigeenka Hantidhowraha Guud ee JFS ayaa u mahadceliyay ka soo qaybgalayaasha iyo agaasimeyaasha Xafiiska ee fududeeyay qabsoomidda aqoon-is-weydaarsigan.
