Munaasabad lagu daah furayay olole ku saabsan deeq bixin xagga dhiiga ah oo ay soo qaban qaabiyeen arday wax ka barata Jaamacadda banaadir oo ay ka qeyb galeen Xildhibaanno ka tirsan Baarlamaanka Soomaaliya, Mas’uuliyiin ka socotay Wasaarada caafimaadka Xukuumada Soomaaliya, maamulka gobolka banaadir, dhakhaatiir, arday dhakhaatiir ka socotay dowladda Turkiga iyo marti sharaf kale ayaa lagu qabtay magaalada Muqdisho.
Munaasabada ayaa intii ay socotay waxaa looga hadlay ahmiyadda ay xilligan u leedahay bulshada Soomaaliyeed in la helo deeq bixiyayaal dhiig, taasoo si lacag la’aan ah loogu deeqayo ama lagu badbaadinayo bulshada Soomaaliyeed gaar ahaan hooyada iyo dhallaanka Soomaaliyeed ee u dhimanaya dhiig la’aanta
Qaar ka mid ah dhaqaatiirtii ka hadashay goobta ayaa si wada jir ah u soo dhaweeyay ololahan lagu shaubayo deeq dhiig ah ee lagu keydinayo bankigii dhiiga si loo samata bixiyo shacabka Soomaaliyeed.
Maamulaha qeybta sheybaarka ee Wasaarada caafimaadka Qaasim Cabdi Jimcaale oo ka hadlay munaasabadda ayaa ku booriyay bulshadu in la garab istaago howlahan wax loogu qabanaya bulshada.
Xildhibaan Amiin Xasan Aalow oo ah xoghayaha guddiga cadaaladda iyo arrimaha diinta ee Baarlamaanka ayaa ardayda ku dhiiri geliyay inay labo jibaaraan dadaallada ay ugu gurmanayaan shacabka, isla markaana dhiiga loogu yabooho dadka xanuunsan ee ku jira isbitaallada Muqdisho.
Guddoomiyaha guddiga arrimaha bulshada ee Baarlamaanka Xildhibaan Cismaan Maxamuud Dufle ayaa sheegay in tani ay tahay fikirka aad u wanaagsan oo ah in dadka dhiig loogu deeqo, isla markaana dhiigaasi laga qaado dadka awooda, waxaan idin sheegayaa in aan idin garab taaganahay.
