Arday gaaraysa 65 ayaa maanta siminaar loogu soo gabo gabeeyay Muqdisho, kaasi oo lagu barayay xirfado ay ku shaqeystaan oo ay ku maareeyaan noloshooda, waxaana xiritaankii siminaarka ka qeyb galay Xildhibaanno, mas’uuliyiin ka tirsan Wasaaradda shaqada iyo arrimaha bulshada, ururka haweenka Qaranka iyo marti sharaf kale.
Guddoomiyaha Machadka Horseed International Collage Aadan Cabdi Cabdulle ayaa tilmaamay in siminaarkan uu ahmiyad gaar ah ugu fadhiyo ardayda ka qeyb gashay.
“Sidaanu ognahay siminaarka waxa uu ku aadanaa dhallinyarada dalka wax ku baratay in shaqo loo abuuro, shaqada loo abuurayana ay noqdaan in mudnaanta koowaad ay helaan dhalinyarada sidaan wada ognahay Wasaarada shaqada iyo arrimaha bulshada waxey door weyn ka qaadatay oo ah in dhallinyarada Soomaaliyeed la siiyo fursadaha shaqo ee ay haystaan shaqaalaha ajaaniibta”ayuu yiri Aadan.
Guddoomiyaha ururka Haweenka Qaranka Batuulo Sheekh Axmed Gabale iyo Agaasimaha Waaxda taba barada Ismaaciil Macalin Cabdullaahi ayaa sheegay in siminaarka la siiyay ardayda ay wax badan u tari doonto, isla markaana ay u noqon karto mid ay ku shaqeystaan, waxaana ay kula dar daarmeen in waxyaabaha ay ka faa’iideysteen ay ugu adeegaan bulshadooda.
Xildhibaan Maxamed Cumar Dalxa oo ka hadlay xiritaanka siminaarka ayaa ardayda ku booriyay inay heystaan fursad wanaagsan oo ay u soo jeestaan horumarinta dalkooda.
“Marka in yadidiilo ama dhallinyaro habla iyo wiilal oo wadankoodii u istaagayo in ay badbaadiyaan wadankooda aqoon ay ku bad baadiyaan waa wax aad loogu farxo, arintaasi waan dhiiri-galineynaa hadaanahay Baarlamaanka Soomaaliyeed, si sharaf lehna waxaan mar walba ay tahay in aaan idin kala soo qeyb galno munaasabadaha nuucaani oo kale ee lagu dhiira galinayo dhallinyarada Soomaaliyeed”.ayuu yiri Xildhibaan Dalxa.
Ardayda ayaa la guddoonsiiyay shahaadooyin.
Sawir Qaade:- Farxaan Suleymaan Daahir
