Wararka naga soo gaaraya Gobalka Mudug ayaa sheegaya in maleeshiyada Al-Shabaab ay dileen labo qof oo shacab ah sidoo kalana ay dhaawac u gaysteen ilaa iyo Saddex ruux oo kale.
Argagixisada Al-Shabaab ayaa dadkaan rayid ah Gaari ay saarnaayeen waxay u galeen inta u dhaxaysa deegaanada Caad iyo Camaara oo hoostaga degmada Xarardheere ee Gobalka Mudug.
Dadka deegaanka ayaa Radio Muqdisho u sheegay in sidoo kale Maleeshiyaadka Al-Shabaab ay wali afduub ahaan u haystaan 10-qof oo kale iyo Gaarigii ay saarnaayeen.
Arrintaan ayaa imaanaysa iyadoo shalay ilaa iyo xalay dagaal xoogan uu maleeshiyada Al-Shabaab iyo dadka deegaanka ku dhexmarayay deegaanka Caad ee Gobalka Mudug.
Dagaalka ayaa ka danbeeyay ka dib markii Argagixisada Al-Shabaab ay ku amreen dadka deegaanka inay keenaan Caruurtooda si loo dagaal galiyo iyo inay bixiyaan lacago Baad ah, hayeeshee amaradaas ka yimid maleeshiyada ayaa waxaa ka soo horjeestay oo diiday dadka shacab ah.
