Kooxda arxan lawayaasha ah ee Al-Shabaab ayaa markale ay ku caddaatay inaysan wax texgelin ah u haynin Soomaalinimada iyo nolosha dadka Soomaaliyeed kadib markii weerar fuleynimo oo maleeshiyada Al-Shabaab ku qaadeen qoys Soomaaliyeed oo gaarigooda ku dhex jira, iyaga oo u adeegsaday dilka qoyska qarax.
Weerarkan lagu beegsaday qoyska aan waxba galabsan ayaa ka dhacay meel u dhaw magaalada Bacaadweyn ee ka tirsan dowlad goboleedka Soomaaliyeed ee Galmudug, halkaasoo ay Ciidanka Qaranka iyo bahwadaagtooda gadaal uga cayriyeen dhawaan.
Wasiirka Warfaafinta, Dhaqanka iyo Dalxiiska, Mudane Cismaan Dubbe ayaa cambaareeyey faldambiyeedkaa bahalnimada ah, isla markaana amaanay horumarka ay ka sammeynayaan ciidamada Qaranka dagaalka ka dhanka ah argagixisada,.
Wasiirka ayaa ku boorriyey Ciidanka Qaranka inay sii labalaabaan hawlgallada ay ku difaacayaan dadka Soomaaliyeed ee shacabka ah.
