Cadakibir oo 67-km dhinaca koofur bari ka xigta magaalada Cadaado oo guduheeda ay ku nool yihiin in ka badan 1500 oo Qoys, hareeraheedana ay daganyihiin kumanaan kale oo reer Guuraa iyo dadka tuulooyinka ku nool isugu jira ma laha wax Isbitaal ah, waxaana bulshada halkaasi ku nool dhibaato wayn ku haya adeeg la’aanta caafimaadka, gaar ahaan Hooyada iyo dhallaanka.
Xarun MCH oo bixisa adeegyo kooban ayaa ku taal Cadakibir, taas oo aan wax ka qaban karin xaaladaha deg degga ah, sida ay inoo sheegtay Kaafiyo Abshir Cadaawe oo ka mid ah hawlwadeenada xarunta Hooyada iyo Dhallaanka.
Dhawr Haween ah ayaa geeriyooday xilliga Foosha, ka dib markii ay waayeen wax gurmad caafimaad ah, lama hayo wax tira koob ah.
Daahir Ugaas Daa’uud oo ah Guddoomiyaha Cadakibir ayaa warbaahinta Qaranka u sheegay in Hooyada iyo dhallaanku ay yihiin kuwa ugu daran ee xaaladaasi saamaysay, uuna xasuusanyahay ilaa 5- Haween ah oo umul raacday, kuwaas oo jidka ku sii dhintay inta loo sii waday Cadaado.
Macalin Axmed Cismaan Khayre oo macalin duigsi Qur’aan ka ah Cadakibir xaaskiisa ayaa 2-sano ka hor umul raacatay, waxa uuna hadda hayaa 13-Carruur ah oo ay ka tagtay, isagoo ka walwalsan hadii xaaladaas adeeg la’aanta caafimaadku ay sii jirto inay dad badani u dhintaan daryeel la’aan.
Iskuulka Cadakibir oo ay dhightaan ilaa 150 Arday, ayaa isagana waxaa ka muuqda dayac dhinacyo kala duwan ah, malahan Musqulo, iyadoo darbigiisana qaybo ka mid uu burbursanyahay, waxaana taas sii dheer macalimiinta Iskuulka oo aan mushaar loo haynin.
Maamulka iyo bulshada Cadakibir ayaa Isxilqaan ku dhisay xarumaha adeegyada bulshada, iyagoo kaashanaya qurbajoogta, waxaana hadda ay doonayaan in laga gacansiiyo Dhismaha Isbitaal ay magaaladu yeelato iyo dhamaystirka xarunta maamulka magaalada oo qabyo ah.
