Kulanka baarlamaanka ee maanta oo uuu shir guddoominayay Guddoomiyaha Golaha Shacabka Mudane Maxamed Sheekh Cismaan Jawaari ayaa Xildhibaanadu waxa ay guda galeen ka doodista hanaanka doorasho ee dalka, oo uu dhawaan baarlamaanka horgeeyay Ra’iisul wasaaraha Soomaaliya.
Xildhibaannada baarlamaanka ee maanta aragtidooda dhiibtay oo gaarayay ilaa iyo 30 mudane, ayaa waxa ay qaarkood soo jeediyeen in barnaamijka doorashada dib loogu celiyo Xukuumadda oo ay u soo sameyso jadwal, halka qaar kale oo ka mid ah Xildhibaananda ay soo jeediyeen in arrintan loo saaro guddi ka tirsan baarlamaanka oo soo saxo qoraalka, kadibna golaha loogu soo celiyo.
Guddoomiyaha baarlamaanka Federaalka ah ee Soomaaliya Mudane Maxamed Sheekh Cismaan Jawaari ayaa macneeyay hadal dadka qaarkii ay si qalad ah u fasirteen, kaasi oo uu ku sheegay in uu ahaa in Xilliga doorashada labo bil ka hor jiritaanka baarlamaanka la soo afmeero.
Kulanka baarlamaanka ee maanta ayaa waxaa weli harsan oo aan aragtidooda dhiiban 40 Xildhibaan, kuwaasi oo beri aragtidooda dhiibanaya, waxaana ay ka doodayaan hanaanka doorasho ee dalka.
