Doodda hindise sharciyeedka shaqaalaha ajnabiga waxa uu maanta Baarlamaanka gudagalay ka doodistiisa, taasi oo guddiga adeega bulshada ee baarlamaanka uu markale baarlamaanka hor keenay, waxaana mudanayaashu aragtidooda ay quseysay dhowr dhinac, iyadoo ay jirtay hal aragti oo ay ka wada sinaayeen, kaasi oo ahaa in sharcigan la meelmariyo, si loo xakameeyo shaqaalaha ajaanibta ah ee dalka ku soo qul qulaya iyo in shaqo qof muwaadin Soomaaliyeed uu qaban karo aan qof ajnabi ah loo dhiibin.
Guddoomiyaha guddiga adeega bulshada ee Baarlamaanka Dr Cismaan Maxamed Maxamuud Dufle oo mudanayaasha Baarlamaanka uga mahadceliyay aragtidooda ayaa sheegay in muhiimadda sharcigan ay tahay in muwaadiniinta ay fursad u helaan inay dalkooda ka shaqeystaan, isla markaana la xakameeyo shaqaalaha ajaanibta ah ee dalka ka howlgalla.
Guddoomiye ku-xigeenka koowaad ee Baarlamaanka Mudane Jeylaani Nuur Iikar oo gabo gabadii kulanka ka hadlay ayaa guddiga iyo Wasaaradda ugu baaqay in sharciga ay dib u eegis ku sameeyaan oo ay ku soo daraan talooyinkii ay Xildhibaannada soo jeediyeen.
βWaxaan farayaa guddiga iyo Wasaaradda in wixii soo jeedin meeshan laga soo jeediyay ay dib isugu noqdaan oo beri Axadda ah, oo aad ku soo dartaan talooyinka ay mudanayaasha soo jeediyeen, isla markaana aad nagu soo celisaan Baarlamaanka Maalinta Isniinta ah, oo ah akhrinta saddexaad, Β isla maalintaas xaq ayaad u leedihiin in aan cod gelino, shirka waa inoo xiranyahayβ ayuu yiri Guddoomiye Jeylaani.
