Baarlamaanka Federaalka ah ee Soomaaliya oo maanta kulan ku yeelanaya xarunta golaha shacabka ayaa daah furis lagu sameynayo qeybta koowaad ee qodobo ka mid ah dastuurka KMG ah ee dalka oo dib eegis lagu sameeyay.
Xildhibaan Maxamed Cumar Maxamuud Habdhowraha Baarlamaanka Federaalka ah ee Soomaaliya oo la hadlay Radio Muqdisho ayaa sheegay in ajandaha Baarlamaanka maanta uu ku saabsanyahay daahfuris lagu soo bandhigayo qeybta koowaad ee soo jeedinta dib u eegista dastuurka, kaasi oo ay si wada jir ah u soo diyaariyeen Guddiga baarlamaanka u qaabilsan dastuurka iyo guddiga madaxa banaan ee dib u eegista dastuurka KMG ah.
Xildhibaan Maxamed Cumar Maxamuud ayaa tilmaamay in kulanka golaha shacabka ee maanta ay ka soo qeyb geli doonaan wakiilo ka socda baarlamaanka maamul goboleedyada dalka ka jira, si ay goob joog uga noqdaan waxka badalka lagu sameeyay qodobo ka mid ah dastuurka KMG ah.
