Bilowga kulankii Baarlamaanka ee maanta waxaa Xildhibaannada lagu hor dhaariyey Xildhibaan Liibaan Cumar Cabdiraxmaan oo bedelay Xildhibaan hore Maxamed Xuseen Nuur (Xagaafe) oo isagu iskiis xilka isaga casilay, dhaartaasi kadibna waxaa Xildhibaannada Baarlamaanka laga hor akhriyey warbixin ku saabsan shirkii Baarlamaanka Jaamacadda Carabta ee lagu qabtay dalka Tunisia, ayadoo warbxintaasina uu Xildhibaannada u akhriyey Xildhibaan Maxamed Cumar Dalxa oo ka tirsan Jaamacadda Carabta.
Xildhibaannada Baarlamaanku waxey guda galeen dooda sharciga Maalgashiga Shisheeye waxaana mudaneyaashu bilaabeen iney aragtidooda ku daraan sharcigan oo maanta lasoo gebagebeeyey akhrintiisa 2aad, gunta aragtida Xildhibaannaduna waxa ay kala ahaayeen hubinta shirkadaha u imaanaya maalgashiga dalkeenna, kaalinta ay dadka Soomaaliyeed ku yeelan karaan fursadaha ay ajaaniibtu ku maal gashanayaan Dalkeenna iyo mudada fasaxa ama ruqsada loo siinayo ajaaniibta maalgashadeyaasha ah.
Related posts
Wasiiru-dowlaha Wasaaradda Ganacsiga iyo Warashadaha Xukuumadda Federaalka Soomaaliya Mudane Maxamed Xasan Aadan oo Xildhibaannada ka hor hadlay ayaa faah faahiyey doorka Wasaarradaha Xukuumaddu u fasaxayo sharcigan, isagoo geesta kalena Xildhibaannada ka codsaday iney sharcigan meel mariyaan maadaama baahi weyn loo qabo.
Guddomiye ku-xigeenka Koowaad ee Baarlamaanka Federaalka Soomaaliya Mudane Jeeylaani Nuur Iikar oo kulanka shir guddoominayey ayaa gebagebadii ka dalbaday Guddiga ganacsiga, dhaqaalaha iyo warashadaha ee Baarlamaanka in tallooyinka Xildhibaannada kusoo daraan sharcigan, dhanka kalena waxa uu xusay in kulanka ugu soo horeeya Baarlamaanka uu ku gudageli doono dooda Hindise Sharciyeedka Saxaafadda Qaranka.
Sharci kasta oo Baarlamaanka la hor keeno waxa uu maraa seddex akhrin, hindise sharciyeedka maalgashiga shisheeyana waxa uu marayaa marxaladii ugu dambeysay mar hadii maanta lasoo gebagebeeyey doodiisa.
