Banbax howleedkan oo ay ka soo qaybgaleen hayโadaha u xilsaaran dib-u-eegista dastuurka ee kala ah Wasaaradda Arrimaha Dastuurka, Guddiga La socodka ee Dib-u-eegista Dastuurka ee Baarlamaanka, iyo Guddiga Madax-bannaan ee Dib-eegista iyo Hirgelinta Dastauurka, oo socday muddo 5 maalin ah ayaa maanta lagu soo gabagabeeyay magaalada Djibouti ee dalka Djibouti.
Xiritaanka shirka waxaa goobjoog ka ahaa madaxda saddexda hayโadood ee u xilsaaran dib-u-eegista dastuurka, Guddoomiyaha golaha wakiilada Puntland mudane Cabdixakiim Maxamed Axmed iyo habdhowraha Golaha Shacabka Mudane Sharmarke Garaad Saleebaan iyo lataliyaasha hay’adaha kala duwan.
Intii u socday banbax howleedkan waxaa saddexda hayโadood ee u xilsaaran dib-u-eegista dastuurka ay si wadajir ah u diyaariyeen istiraatiijiyadda midaysan ee wacyigalinta iyo latashiga dadwaynaha ee dib-ueegista dastuurka iyo qorshe howleedka midaysan ee latashiga iyo wacyigalinta dadwaynaha ee arrimaha dib-u-eegista dastuurka sanadkan 2019. Sidoo kale waxaa la isku raacay waqtiga la bilaabayo latashiyada iyo wacyigalinta dadweyanaha ee ku saabsan cutubyada dib-u-eegista lagu sameeyay.
Xubnihii ka hadlay kulanka ayaa bogaadiyay wadashaqaynta saddexda hayโadood ee u xilsaaran dib-ueegista dastuurka iyo sida ay uga goโantahay in la dhamaytiro dastuurka, waxayna ballan qaadeen in ay sii xoojin doonaan wada shaqayntooda, maadaama Ummadda Soomaaliyeed ay ka sugayso dastuur dhamaystiran oo lagu wada heshiiyay.
Guddoomiyaha Golaha Wakiilada Puntland Cabdixakiim Maxamed Axmed oo hadal ka yiri kulanka xiritaanka ayaa sheegay in loo baahanyahay in laga wada shaqeeyo sidii Ummadda Soomaaliyeed dhibta iyo is qabqasiga ay uga bixi lahayd, si taas loo gaarana loo baahanyahay heshiis Ummadda ay wada dhigatay, kaasna waa sidii loo dhamaystiri lahaa dastuurka oo ah heshiiska bulshada.
Gabagadii, waxaa lagu ballamay in la bilaabo ololaha wacyigalinta iyo latashiyada dadwaynaha ee dib-u-eegidta dastuurka gaar ahaan cutubyada dib-u-eegista lagu sameeyay bisha Maarso 2019, iyadoo qorshuhu yahay in la dhamaytiro Dastuurka ku meelgaarka ah sanadkan 2019 .
