Waxaa ka qeyb galay Kulanka Wasiirada Maaliyadda, Ganacsiga, Qorsheynta, masuuliyiin, Saraakiil Ciidan, Shaqaallaha Wasaaradda Maaliyadda XFS iyo marti sharaf kale.
Wasaaradda Maaliyadda ayaa waxay soo bandhigtay horumarka Daqliga gudaha ee dalka ee sanadihii lasoo dhaafay, waxaana sanadkii ugu dambeeyey Dakhliga uu kordhay Sodon iyo Kow Boqolkiiba oo ka dhigneyd Miisaaniyadda guud ee Qaranka ee Sanadkii 2018 Afartan iyo Shan Boqolkiiba inay aheyd lacagaha laga soo arruuriyey Canshuuraha .
Agaasimaha guud ee Wasaaradda Maaliyadda XFS Mudane Saleymaan Maxamed Cumar ayaa Howl-wadeenada Wasaaradda uga mahad celiyey dadaalka ay ku bixiyeen horumarinta dalkooda.
Taliyaha Hoggaanka Canshuuraha ee Ciidanka Booliska Sarreeye guuto Cabdullaahi Xasan Bariise ayaa waxa uu sheegay in wax badan uu iska badalay dhibkii ay ku qabeen Canshuur bixiyeyaasha.
Wasiirka Wasaaradda Ganacsiga iyo Warshadaha XFS Mudane Maxamed Cabdi Xayir Maareeye ayaa sheegay in Wasaaradda Maaliyadda ay ku socoto Wado wanaagsan oo Ammaan mudan.
Wasiirka Wasaaradda Maaliyadda XFS Mudane C/raxmaan Ducaalle Beyle ayaa Bulshadda Soomaaliyeed uga mahad celiyey siddii ay u garab istaageen Wasaaradda Maaliyadda guulaha ay gaartay iyo siddii ay uga gudbi laheyd caqabadaha ku wajahan.
