Madaxweynaha Mareykanka Barack Obama oo dalka Kenya kula kulmay Madaxweynaha Kenya ayaa xusay in dowladda Mareykanka ay sii wadayso la dagaallanka argagixisada Al-Shabaab si guud ahaan gobolka looga cirib tiro.
Mr Obama ayaa yiri “Dadaalada waa kuwo wadajir ah oo wadankeyga kala shaqeynayo Uganda, Ethiopia iyo kuwo kale, anaga waxaan si isdaba joog ah hoos ugu dhignay dhulka ay ka taliyaan Al-Shabab, waxaan awoodnay in aan yareyno dhibaatada ay ka geysan karaan gudaha Soomaaliya,” isagoo hadalkiisa sii wata ayuu Madaxweyne Barack Obama ku daray “Waxaan sidoo kale wiiqnay awooda shabakadaha argagaxisada ee ka howlgala bariga Afrika, si lamid ah guud ahaan caalamka oo dhan kooxaha gacan ka hadalka aaminsan aan awoodooda daciifinay, balse wali dhibaato ayay geysan karaan, tusaale ahaan shakhsiyaadkii ka dambeeyay weeraradii Jaamacadii Gaarisa iyo suuqa ganacsiga ee West gate, waa kuwo naftooda biimeeya oo dad badana dhibaateeya, waana weeraro ay la beegsadaan dadka shacabka ah”.
Madaxweynaha Mareykanka Barack Obama ayaa shirkiisa jaraa’id ku sheegay in Madaxweynaha Kenya Uhuru Kenyatta ay ka wada hadleen in la xoojiyo la dagaallanka Al-Shabaab, iyadoo la kaashanayo dowladda Federaalka ah ee Soomaaliya, si loo joogteeyo cadaadiska la saarayo kooxaha argagixisada.
“Anagoo la shaqeynayna dowladda Soomaaliya, maadaama dowladda ay isku balaarinayso deegaanada Al-Shabab ay joogaan, Dowladda hadda jirta waa mid uu caalamku aqoonsanyahay, anaga waxaan sidoo kale sameynayaa in aan kordhino awooda ciidan ee ka dhanka ah Al-Shabaab si dowladda Soomaaliya u awoodo in ay dhisato hey’adaheeda dowliga ah, taas oo hadda horumar sameynaysa, waxaa intaasi dheer in aan dhanka mukhaabaraadka ka caawin doona dowladda Kenya iyo guud ahaan wadamada gobolka, si loo ogaado, isla markaana looga hor tago kooxaha dhibaatada ka shaqeeya had iyo jeeraale” ayuu yiri Madaxweyne Barack Obama.
