Dowlad-goboleedka Jubbaland ayaa maanta ku guuleysatay in ay dib u heshiisiin u sameyso beelo walaalo ah oo galbeedka magaalada Kismaayo ay xurguf ku dhexmartay, iyadoo lagu dadaalay sidii loo dhammeyn laha xurguf iyo wax walba oo kala fogeyn kara bulshada Jubbaland.
Shirkaan lagu heshiisiinayay Beelaha walaalaha ah ayaa waxaa laga soo saarey go’aanno la xariira in dib aysan u soo noqon colaadda iyo is afgaran waaga sababi kara gacan ka hadal.
Goobta uu heshiisku ka dhacay ayaa waxaa ku sugna Wasiirka Arrimaha Gudaha Jubbaland Maxamed Warsame Darwiish,Wasiirka Cadaaladda iyo Diinta Jubbaland Maxamed Sheekh Yuusuf Cumar iyo Wasiirka Ganacsiga Jubbaland Cabdi Nuur Cali Aadan.
Waxa kale oo ka qayb galay kulanka siyaasiyiin, waxgarad iyo hoggaanka dhaqanka beelaha maanta ku heshiiyay magalaada Kismaayo.
Hoggaanka dhaqanka labada beel ayaa sheegay in ay diyaar u yihiin nabad ku wado noolansho ayna ka fogaan doonan wax walba oo dhib horseedi kara.
Wasiirka arrimaha Gudaha ee Dowlad Goboleedka Jubbaland Maxamed Warsame Darwiish ayaa sheegay in Dowlad Goboleedka Jubbaland ay ku dadaali doonta sidii loo fulin lahaa go’aanadii kasoo baxay shirka iyo nabad kuwada noolanshaha shacabka Jubbaland.
Wasiirka Cadaaladda ee Jubbaland Maxamaed Yusuuf Cumar ayaa dhankiisa sheegay in muhiim ay tahay ka fogaanshaha wax walba oo sababi kara in bulshada Soomaaliyeed colaad isu qaado.
