Tan iyo horaantii bishii Maarso ee la soo dhaafay guud ahaan meelaha uu maro webiga Shabeelle ee gobollada dalka waxaa ka jirtay biyo la’aan baahsan oo ka dhashay marki uu wabigu guray, iyadoo oo lagu jiro xiliyada kuleylaha.
Arrintan waxa ay saameen xoogan ku yeelatay dadkii ay noloshoodu ku tiirsaneed biyaha webiga Shabeelle, gaar ahaan dadka ku nool deegaanada ku teedsan wabiga.
Meelaha uu wabigu guray dhexdooda dad ayaa qotay si ay biya ugu helaan, laakiin biya wasaqeysan oo ay ka cabaan qaarkood oo carruuri u badan waa ay ku dhintaan, markii uu haleelay shuban biyood, sidoo kale in ka badan 300 qof ayaa la dhigay isbitaalka Jowhar kuwaas oo uu soo ritay cudurka shubanka inkastoo dadaal kadib dib ay uga biskoodeen .
19 kii bishaan maalinkii Talaadada aheyd ayuu biya keenay webiga oo aad loo sugayay dadka ayaa isugu soo baxay iyaga oo faraxsan.
Sokori Maxamed Nuur oo ka mid ha beeralayda oo faraxsan misna wata baaskiil uu kaga yimid beertiisa, waxaana uu yiri “Waxaan ku faraxsanahay wabiga soo inuu biya keenay, ilaah ayaa mahad leh, runtii waxaan nahay dad danyar ah oo ku tiirsan webiga beerahana ka waraabsan jiray markii guray, waxaan ka soo bara kacnay tuulooyinkii aan beeraha ku laheen, hadda waan u laabanay isla markii uu biya keenay dib ayaana beeraheena u falanaynaa”
Beeralayda waxa ay dib u falanayaan beerahooda iyagoo ku abuuraya dalagyadaadi hadba ay u arkaan inuu u gadmayo qaarkood oo aan la sheekaystay waxa ay ii sheegeen inaanay waligood arag wabiga uu sidan u guray inkastoo ay tilmamayaan inuu biya yareen jiray.
Cabdishakuur Cali Axmed
