Taliyaha qeybta Nabad gelyada Waddooyinka Soomaaliya, Janaraal; Maxamed Yuusuf Cumar (Madaale), ayaa sheegay in ay gacanta ku hayaan kiiska shilkii dhowaan ka dhacay deegaanka Ceelasha Biyaha, markii ay Ciidanka AMISOM gaari jiirsiiyeen Saddex muwaaddiniin Soomaaliyeed ah oo watay Mooto Bijaaj.
Taliyaha ayaa Allaha u naxariistee Saddexda muwaaddin Magacyadooda ku kala sheegay, Alifle Cabdishakuur Bootaan Cabdille,oo ka tirsanaa Ciidanka Daraawiishta, Cabdiqaadir Xuseen Cali, oo ka tirsanaa Ciidanka Xoogga Dalka Soomaaliyeed iyo wadihii Mootada oo lagu Magacaabi jiray, Dalmar Jeylaani Abuukar Cabdi.
Wuxuu sheegay Taliyuhu in Baabuur nooca gaashaaman ah oo ay lahaayeen uu jiiray Marxuumiinta, laakiin nasiib wanaag ay daba socotay Mooto kale oo ay la socdeen xubno ka tisan Ciidamada Qaranka, taas oo fududeysay in shilkaasi laga helo xog badan oo ku filan Dadka Soomaaliyeed ehelada dhibbanayaasha.
Taliyaha ayaa sheegay sababta ku kalliftay Ciidanka AMISOM in ay ka cararaan goobta uu shilku ka dhacay in ay ahayd baqdin ay ka qabeen in ay waxyeello kaga timmaado Dad ka careysan dhacdadaasi.
Taliyaha qeybta Nabadgelyada Waddooyinka ee Soomaaliya, Janaraal; Madaale, ayaa sheegay in Ciidanka AMISOM ay qaateen mas’uuliyadda shilkan, isla markaana ay u hoggaansamayaan sharciga.
Wuxuuna Shacabka Soomaaliyeed ku war geliyay in ay Dowladdu ku howlantahay sidii ay xuquuqdooda ku heli lahaayeen dhibbanayaasha iyo Eheladoodaba, isla markaana ay u hagar bixi doonto, isagoo ugu dambeyn tacsi u diray Dadkii ay sida gaarka ah uga baxeen Saddexda marxuum.
