Injineerada ku howlan dhismaha waddada isku xiri doonto Hobyo iyo Muqdisho ayaa maanta faah faahin ka bixiyay halka ay mareyso dhismaha waddadaasi oo dhawaan la dhagax dhigay, kaddib markii ay maanta halkaasi booqdeen waxgarad, culimaa’udiin, aqoonyahanno iyo abwaanno xilli ay socotay howlaha lagu dhisayo waddada isku xirta labada magaalo.
Dhismahan waddadan oo dhirirkeedu yahay 560km ayaa waxaa ka shaqeynayay gawaarida dhismaha sida cagaf cagaf, iska rogeyaal iyo gaadiid kale oo qeyb ka ahaa howlaha lagu dhisayo waddada isku xiri doonto Hobyo iyo Muqdisho.
Eng, Xasan Maxamed oo ka mid ah quburada dhismaha waddadaasi ayaa tilmaamay in ay meel fiican u mareyso bilowga dhismaha wadddada isku xiri doonto Hobyo iyo Muqdisho.
Sheekh Xasan Caddow, Sheekh Cumar Xerow iyo Sheekh Xasan Sheekh Axmed Siyaar oo ka mid ah mashaa’iqda ugu caansan oo si wada jir ah uga hadlay goobta ay howsha ka socoto ayaa ugu baaqay bulshada Soomaaliyeed inay ka qeyb qaataan dhismaha waddadan, maadaama ay tahay mid danguud ah.
Sheekh C/qaadir Sheekh Maxamed Soomow oo gabo gabadii goobta hadal ka jeediyay ayaa sheegay in diinta Islaamka ay na fareyso in bulshada ay ka qeyb qaataan dhismooyinka danta guud, isla markaana uu shacabka ka codsadayo inay door ku yeeshaan dhismaha danta guud.
Qaar ka mid ah Abwaanno Soomaaliyeed ayaa goobta ka soo jeediyay tix gabayo ah oo ay ku baraarujinayaan shacabka Soomaaliyeed, iyagoo ku muujiyay ahmiyadda ay waddadan u leedahay Ummadda Soomaaliyeed.
