Waxaa magaalada Cadaado ee xarunta KMG u ah dowlad goboleedka Galmudug saaka lagu doortay Wasiir ku-xigeenkii hore ee Warfaafinta Mudane Cabdishakuur Cali Mire oo ka guuleystay musharixii kale ee la tartamayay.
Doorashada oo saaka aroortii hore ka dhacday magaalada Cadaado ayaa kursiga waxaa ku loolamayay musharixiinta kala ah Cabdishakuur Cali Mire iyo Cabdirisaaq Cali Jaamac, waxaana uu Cabdishakuur helay 49 cod halka musharixii kale ee la tartamayay uu isna helay labo cod oo kaliya.
Guddiiga doorashada ayaa ku dhawaaqay in Cabdishakuur Cali Mire uu ku soo baxay doorashadii saaka ka dhacday Cadaado, waxaana ay tilmaameen in maanta ay soo gabo gabeyn doonaan doorashada oo ay dhameystiri doonaan halka kursi ee haray, maadaama kursiga Cabdishakuur uu yahay kii 35aad ee Cadaado lagu soo doortay.
