Maamulka Degmada Cadale iyo kan Gobolka Shabeelada Dhexe ayaa ku guuleystay in qeybo ka mid ah degmadaasi dhawaan laga hirgeliyay Nalalka Cadceeda ku shaqeeya.
Maamulka oo kaashanaya Bulshada degmada ayaa soo abaabulay xaflad balaaran oo loogu dabaal dagayay Horumarka ay ku talaabsatay degmada, barnaamijka Is dhexgalka Bulshada oo mudo ka socday degmadaas iyo hirgelinta nalalka cad ceedda ku shaqeeya.
Xafladda waxaa ka qeyb galay Taliyaha ciidanka Xooga dalka ee Gobolka Shabeelada Dhexe, Taliyaha Ciidamada AMISOM ee Degmada Cadale, madaxda bulshada rayidka ee degmada iyo Dadweyne aad u fara badan.
Waxaana Xaflada ka hor Dhalinyada degmadu ay wada ciyaareen kulan saaxiibtinimo oo loogu magacdaray Cayaariha Nabada, Waxaana bilowgii xaflada uu Maamulka Degmada uu ku booriyay bulshada iney ka qeyb qaataan Horumarka dalka.
Gudoomiyaha Degmada Cadale Muxudiin Suudi Macalim ayaa sheegay in uu aad ugu faraxsanyahay hirgelinta mashaariic kala duwan oo lagu horumarinayo degmada.
“Degmada Cadale waxey ku tilaabsatay horumar waxaana sabab u ah bulshada reer Cadale oo muujiyay isku duubnaan iyo karti waxaan balan qaadeynaa inaan sii wadno howlaha, waxaana hubaal ah in gacanta dowladda ay idin soo gaari doonto”.ayuu yiri Guddoomiyaha
Sidoo kale Taliyaha Ciidamada Xooga Dalka ee Gobolka SHabeelada Dhexe Gaashaanle Dhexe Cabqaadir Nuur Qoondhe ayaa ku bogaadiyay Maamulka degmada sida uu uga shaqeynayo Horumarinta iyo Bilic soo celinta Degmada.
Bulshada ku dhaqan Degmada ayaa iyana si weyn usoo dhaweeyay Horumarka ey degmada ku tilaabsatay iyagoo tibaaxay in ay ku diirsadeen Nidaamka dowladnimo ee gaaray degmadaasi.
Degmada Cadale ayaa ka mid ah degmooyinka kasoo kabanaya kadib markii laga xoreeyay kooxda Al-Shabaab, iyadoo hada degmadaasi laga dareemayo horumar baaxad leh oo dhinac walba leh.
.
