Maamulka Jubbaland ayaa maanta sheegay in ciidamada Itoobiya ee qeybta ka ah howl galka AMISOM ay ka qeyb qaadan doonaan howlgalka Jubbooyinka looga xoreynayo maleeshiyaadka Al-Shabaab, si horaanta sanadkan looga cirib tiro guud ahaan dalka.
Madaxweyne ku-xigeenka Maamulka Jubbaland Cabdullaahi Sheekh Ismaaciil Fartaag ayaa tilmaamay in ciidamada AMISOM ay door muuqdo ka qaadan doonaan sidii deegaannada maamulka looga cirib tiri lahaa Al-Shabaab, kadib markii shalay lagu qabtay Kismaayo munaasabad lagu soo dhaweynayay ciidamada Ethiopia ee qeybta ka ah howlgalka AMISOM.
Cabdullaahi Sheekh Ismaaciil ayaa sheegay in ciidamadan ay qeyb ka yihiin ciidamadii qabtay degmada Baardheere, isla markaana wixii hada ka dambeeya ay kala qeyb qaadan doonaan howl galka loogu magac daray Wabiga Jubba.
Ciidamadan ayaa la sheegay in qeybtooda u horeysay ay maalmo ka hor gaareen Kismaayo, isla markaana Markab sida saanad milateri iyo gaadiid ciidan uu ku soo xirtay Dekeda Kismaayo, waxaana qorshuhu yahay in maalmaha soo socda kun askari la gaarsiiyo ciidamada la geeyay Kismaayo.
