Ciidanka Kumaandooska xoogga dalka ee Gorgor ayaa howlgal qorsheysan ku burburiyey fariisimo ay Khawaarijtu ku lahayd deegaanno hoos taga degmada Galcad ee gobolka Galgaduud, Sida uu kusoo waramayo Weriyaha Warbaahinta Qaranka ee Gobolka Galgaduud Abdulahi Warsame Roble.
Ciidanka ayaa howlgalka ka fuliyey degaannada Baraag Sheekh Caamir, Ceel-dhigtaar, Ceel-ciid iyo deegaanno kale, Taliyaha ururka 9-aad ee Gorgor Dhamme Cabdiwali Axmed Xuseen oo howlgalka hoggaaminayey ayaa sheegay in ujeedka howlgalka uu ahaa baacsiga haraadiga Khawaarijta iyo burburinta goobaha ay ku dhuumaaleystaan.
Taliyaha ayaa sheegay in wada shaqeyn buuxda ay kala dhaxeyso shacabka ku nool deegaanadaas oo lasoo wadaaga xogta Khawaarijta dhuumaaleysiga ah, sidoo kale saraakiisha hoggaamineysa ciidankaan waxay u kuur-galeen xaaladda nololeed ee bulshada deegaanadaas.
Weriyaha Warbaahinta Qaranka ee Gobolka Galgaduud Abdulahi Warsame Roble oo Dhuusamareeb jooga ayaa sheegay in ciidamo badan oo dagaalka qeyb ah ay hadda abaabuleyso dowladda Soomaaliya, isla markaana la dardar gelinayo howlgallada ka dhanka ah kooxda ee ka socda gobolka Galgaduud.
