Ciidamada xoogga dalka oo kaashanaya kuwa Nabad Ilaalinta Midowga Afrika ee AMISOM ayaa maanta howlgallo amni xaqiijin ah ka bilaabay inta u dhexeysa Beladweyne iyo Buulo burde, halkasai oo ay ciidamada ka sifeeyeen maleeshiyaad ka tirsan Al-Shabaab oo halkaasi ku dhuumaaleysanayay.
Wariyaha Warbaahinta Qaranka ee gobolka Hiiraan Cabdi-shakuur Cismaan Cali ayaa ku soo waramay in ciidamada ay kala eryeen maleeshiyaad ka tirsan Al-Shabaab, kuwaasi oo ku dhuumaleysanayay inta u dhexeysa Beladweyne iyo Buulo-burde.
U jeedka howlgalka ay ciidamada ka sameeyeen deegaanadaasi ayaa ah sidii ay isugu furi lahaayen isticmaalka waddada isku xirta degmooyinka Beladweyne iyo Buulo-burde, iyadoo maleeshiyaadka Al-Shabaab ay ku dhuumaaleystaan deegaannada u dhow howdka, kuwaasi oo dhibaato ku haya isu socodka gaadiidka iyo dadweynaha.
